జుక్కల్ మండలంలోని కౌలాస్ నాలా ప్రాజెక్టులోకి భారీగా వరద నీరు చేరుతోంది. ప్రస్తుతం నీటి మట్టం 457.60 మీటర్లు ఉండగా, గరిష్ట నిల్వ మట్టం 458 మీటర్లు. ఎగువ పరివాహక ప్రాంతం నుంచి వరద ప్రవాహం కొనసాగితే నీటి మట్టం మరింత పెరిగే అవకాశం ఉంది. అవసరమైతే ప్రాజెక్టు గేట్లు ఎత్తి అదనపు నీటిని కౌలాస్ నాలా వాగులోకి విడుదల చేస్తామని ఇరిగేషన్ శాఖ అధికారులు తెలిపారు. పరివాహక ప్రాంత ప్రజలు అప్రమత్తంగా ఉండాలి. నది, వరద కాలువల వైపు వెళ్లవద్దని అధికారులు హెచ్చరించారు. పశువులు, గొర్రెలను కూడా అటువైపు వెళ్లకుండా చూడాలని సూచించారు. గేట్లు ఎత్తే ముందు ప్రత్యేక హెచ్చరిక జారీ చేస్తామని అధికారులు తెలిపారు.